نصايح تيته كوكو للعرايس
بصي يا حبيبتي انتي وهي
وخصوصاً اللي متجوزه جديد أو لسه هتتجوز تبص أوي 
وتفهم لي هقولو خبرا سنين
هقولك علي شويه حاجات تنفعك غير الكريمات و البرفنات و المكياچ و الحاجات دي
١- حافظي أوي علي صحتك و ماتجيش علي نفسك علشان محدش هينفعك ، ماما ربنا يديها الصحه والعافيه ياما قالتلي الجمله دي بس أنا مكنتش فهماها في الاول (( الصحه يا هبله )) واري الراجل ركبتك ومش توري لقمتك بس فهمت دلوقت معناها ايه 
٢- (( جوزك يحبك عفيه )) صح أوي الجمله دي ، أصله عايزك ديما العروسه الجديده اللي بتتنطط و رايحه جايه مابتقولش آه أبدا٣- محدش أبدا هيشيلك لما تتعبي و لا يقعد بيكي ، لا أمك قادره و لا أخواتك فاضيين لك و لا جوزك طبعا هيعبرك فخدي بالك من صحتك أوي هي اللي هتنفعك٤- لو فاكره انك لما تتعبي جوزك هيقعد جنبك يبوس في إيدك و يعيط علشانك و كل يوم يجيب لك ورد و هو راجع من الشغل تبقي بتحلمي يا قطه ، لو ربنا كرمك هيوديكي لدكتور و هو بينفخ و مش طايق نفسه علشان حاسس انك بدأتي أهو في مشاوير الدكاتره و العيا و هتقرفيه٥- شغل هيركليز ده بلاش منه و اشتغلي في بيتك علي ادك و اللي مايخلصش النهارده يخلص بكره و لا عنه ما خلص٦- ديما اهتمي بأكلك الصحي و اشربي ميه و سوايل كتير و حاولي تنامي بدري علي قد ما تقدري علشان بشرتك و عيونك و نضارتك٧- ماتهريش و تنكتي علي كل حاجه منه و من أهله ، اهدي علي نفسك كده و فكري قبل ماتتصرفي و كيديهم بهدوءك و ابتسامتك٨- وما تستنيش المحروس يجيبلك هديه و تفتكري انه واخد باله من كل المناسبات و الحاجات اللي نفسك فيها و هيجيبهالك ،، دلعي نفسك و هاتي اللي نفسك فيه و لو هو كمان جاب لا قدر الله و ماله زيادة الخير خيرين٩- ماتكتميش في نفسك علشان ترضيه و خلاص ، لو ليكي حق خديه لانك كده أو كده مش هتستحملي طول عمرك و هيجيلك وقت و تنفجري بس هيكون الوقت المناسب فات و اللي ركب يا حبيبتي مابينزلش١٠- أخيراً اوعي تفرحي حد فيكي و اشتكي بس للي خلقك و اطلبي منه يقويكي و يحميكي و خليهم كلهم يشوفوكي قويه و ضهرك مفرود و راسك مرفوعه فماحدش هيعرفك يكسرك و لا يمسك عليكي ذله و لا نقطه ضعف
