رطبي بشرتك بكريم صنع يديكي

كريم لتغذية وترطيب البشرة
الكريم ده بيناسب أصحاب البشرة العادية والجافة والحساسة.
المقادير:
3 أو 4 ملعقة صغيرة شمع عسل النحل مبشور
2 ملعقة صغيرة زيت جنين القمح
3 ملعقة صغيرة زيت اللوز الحلو
2 ملعقة صغيرة زيت جوز الهند
3 ملعقة صغيرة زيت اللوز المر
5 ملعقة صغيرة زيت سمسم
3 ملعقة صغيرة زيت زيتون
½ ملعقة صغيرة عسل نحل
3 نقط زيت ورد

الطريقة:
اخلطي كل الزيوت مع بعضها في وعاء، وحطّيه في حمام مائي على النار، وقلّبيهم مع بعض كويس جدا، وبعد كده ضيفي عليهم شمع عسل النحل المبشور، والحرارة هتخلّي الشمع يسيح.

بعد كده صبّي الخليط في عبوة زجاجية وسيبيه يبرد، هتلاقيه بقى زي الكريم، وتقدري تستخدميه كل يوم مرتين الصبح وبالليل على بشرة نظيفة تماما.

ملحوظة:
شمع العسل بيكون لونه زي لون المستردة، لو لقيتيه أصفر غامق يبقي مش كويس.


ماسك النشا والليمون لعلاج مشكلة المسام الواسعة
تاني ماسك معانا هيكون لتفتيح الجسم والبشرة وعلاج مشكلة المسام الواسعة، وتقدري تستخدميه للأماكن الحساسة وتحت الإبط..
المقادير:
ملعقة صغيرة عسل نحل
3 نقط زيت ورد أو ماء ورد
ملعقة صغيرة نشا
ليمونة

الطريقة:
ضعي مكونات الماسك وقلّبيهم كويس وحطّيهم على الوجه بالكامل حتى منطقة العيون.

وتقدري تستخدمي الماسك ده بطريقة تانية، ودي بتكون مفيدة أكتر:
1- اعملي مساج لبشرة وجهك وجسمك بالليمون في اتجاه واحد من أسفل إلى أعلى اتجاه القلب، وبالنسبة للإيد اعملي المساج في اتجاه دائري، وسيبيه على بشرتك من 3 : 5 دقائق.

2- هاتي بخاخة فيها ميه عادية أو ماء ورد، ورشّيها على الجسم كله، وبعد كده وزّعي النشا زي البودرة على بشرة وجهك وجسمك، وسيبيه لمدة 3 دقائق، وبعد كده افركيه من على بشرتك، وسيبي جسمك يرتاح لمدة 3 دقائق، وبعدين اشطفي وجهك وجسمك بالمية العادية.

3- ادهني وجهك وجسمك بعسل النحل بفرشاة الصبغة بالاتجاهات اللي قلناها قبل كده، واتركيه لمدة 5 دقائق، وتقدري تستخدمي الماسك ده على وشك مرتين أو ثلاثة في الأسبوع، وبالنسبة لجسمك ممكن تعمليه كل يوم.


ماسك الحلبة مغذي ومجدد لخلايا البشرة
المقادير:
ملعقة صغيرة حلبة مطحونة
ملعقة صغيرة لبن بودرة أو سائل
مقدار ماء (حسب الحاجة)
نقطة زيت ورد

ملحوظة:
لو بشرتك جافة استخدمي لبن كامل الدسم، أما لو بشرتك مركّبة أو دهنية استخدمي لبن خالي الدسم.

الطريقة:
اخلطي كل مكونات الماسك مع بعض، وضعي الماسك على وجهك واعملي بيه سنفرة، ثم ضعي كميات منه على الأماكن التعبيرية في وجهك زى الجبهة وبين الحواجب وحول الشفايف، وسيبيه لمدة نصف ساعة أو ساعة إلا ربع، وبعد كده اغسليه بالمية، وممكن بعدها تمسحي وشك بزيت اللوز المر للتفتيح لو بشرتك دهنية، أو زيت سمسم لو بشرتك جافة، أما لو سنك فوق 35 سنة ممكن تستخدمي زيت جنين القمح.

هدية بسيطة من صنع إيدك
1- هاتي ½ متر شريط ستان أي لون وحطّي على طروفة المقصوصة مانيكير شفاف علشان الستان مايطلعش فتل زيادة، وبعد كده هاتي وردة صغيرة والزقيها في الشريط الستان، وهتبقى عاملة كأنها عقد صغير.

الفكرة دي بسيطة وسهلة وممكن تعمليها مع أطفالك علشان يقدّموها لك كهدية بسيطة في عيد الأم ويحسّوا إنهم قدّموا لك حاجة مميزة.